കേരള സർക്കാർ “പ്രിയദർശിനി” പദ്ധതിയുടെ ഭാഗമായി ജൂൺ 15 മുതൽ സ്ത്രീകൾക്കും ട്രാൻസ്ജെൻഡർ വ്യക്തികൾക്കും KSRTC ഓർഡിനറി ബസുകളിൽ സൗജന്യ യാത്ര അനുവദിക്കാൻ തീരുമാനിച്ചിരിക്കുകയാണ്. മറ്റ് പല സംസ്ഥാനങ്ങളിലും വിജയകരമായി നടപ്പിലാക്കിയ ഈ മാതൃക കേരളത്തിലും എത്തുമ്പോൾ, ഇത് പൊതുസമൂഹത്തിൽ വലിയൊരു ചർച്ചയ്ക്ക് വഴിതുറന്നിരിക്കുന്നു.
സാധാരണക്കാരായ സ്ത്രീകൾക്കും കുടുംബശ്രീ പ്രവർത്തകർക്കും ഇത് വലിയൊരു സാമ്പത്തിക ആശ്വാസമാകുമെന്നും പൊതുയിടങ്ങളിൽ ഇവരുടെ പങ്കാളിത്തം വർദ്ധിപ്പിക്കുമെന്നും ഒരു വിഭാഗം സ്വാഗതം ചെയ്യുന്നു. എന്നാൽ, നിലവിൽ വലിയ സാമ്പത്തിക പ്രതിസന്ധി നേരിടുന്ന കെ.എസ്.ആർ.ടി.സി.ക്ക് ഈ സബ്സിഡി ഭാരം താങ്ങാനാകുമോ എന്ന ആശങ്ക മറുവിഭാഗം പങ്കുവെക്കുന്നു. സ്വകാര്യ ബസുകൾ ഭൂരിപക്ഷമുള്ള റൂട്ടുകളിലെ യാത്രക്കാർക്ക് ഇതിന്റെ പ്രയോജനം ലഭിക്കുമോ എന്ന പ്രായോഗിക ചോദ്യങ്ങളും ഉയരുന്നുണ്ട്. ഈ പദ്ധതിയെ നിങ്ങൾ എങ്ങനെ വിലയിരുത്തുന്നു?
ഒരു ജനക്ഷേമ പദ്ധതി ജനങ്ങളിലേക്ക് എത്തുമ്പോൾ ഉണ്ടാകുന്ന പ്രായോഗികമായ നേട്ടങ്ങളും കോട്ടങ്ങളും നേരിട്ട് മനസ്സിലാക്കാൻ ഈ ചർച്ച സഹായിക്കും. സബ്സിഡികൾ കൃത്യമായി അർഹരിലേക്ക് എത്തുന്നുണ്ടോ എന്ന് വിലയിരുത്താനും, പൊതുഗതാഗത സംവിധാനങ്ങൾ കൂടുതൽ മെച്ചപ്പെടുത്തുന്നതിനായി പൊതുജനങ്ങളുടെ നിർദ്ദേശങ്ങൾ അധികാരികളുടെ ശ്രദ്ധയിൽപ്പെടുത്താനും നിങ്ങളുടെ ഓരോ അഭിപ്രായവും സഹായിക്കും.
പദ്ധതിയുടെ ലക്ഷ്യം സ്വാഗതാർഹമാണെങ്കിലും, കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന കെ.എസ്.ആർ.ടി.സി.ക്ക് ഇത് താങ്ങാനാകുമോ എന്ന് സംശയമാണ്. ജീവനക്കാർക്ക് ശമ്പളവും പെൻഷനും കൃത്യമായി നൽകാൻ പോലും ബുദ്ധിമുട്ടുന്ന ഒരു പൊതുമേഖലാ സ്ഥാപനത്തിന് മേൽ കൂടുതൽ സബ്സിഡി ഭാരം അടിച്ചേൽപ്പിക്കുന്നത് ആത്മഹത്യാപരമാണ്. സർക്കാർ കൃത്യസമയത്ത് ഈ തുക (Reimbursement) കെ.എസ്.ആർ.ടി.സി.ക്ക് കൈമാറിയില്ലെങ്കിൽ ബസുകളുടെ എണ്ണം വീണ്ടും കുറയും. ഫലത്തിൽ, യാത്ര ചെയ്യാൻ ബസുകളില്ലാത്ത അവസ്ഥ വരികയും അത് സ്ത്രീകളെയും സാധാരണക്കാരെയും ഒരുപോലെ ബുദ്ധിമുട്ടിക്കുകയും ചെയ്യും. സൗജന്യ യാത്രയേക്കാൾ പ്രധാനം കെ.എസ്.ആർ.ടി.സി.യെ ലാഭകരമാക്കുക എന്നതാണ്.
ഈ പദ്ധതിയെ കേവലമൊരു സൗജന്യമായി മാത്രം കാണാനാകില്ല; ഇതൊരു വലിയ സാമൂഹിക നിക്ഷേപമാണ്. നമ്മുടെ നാട്ടിലെ ഭൂരിപക്ഷം സ്ത്രീകളും (പ്രത്യേകിച്ച് കുടുംബശ്രീ പ്രവർത്തകർ, തോട്ടം തൊഴിലാളികൾ, ഹോം നഴ്സുമാർ, കച്ചവട സ്ഥാപനങ്ങളിലെ ജീവനക്കാർ) തുച്ഛമായ വരുമാനത്തിന് ജോലി ചെയ്യുന്നവരാണ്. അവരുടെ പ്രതിമാസ വരുമാനത്തിന്റെ വലിയൊരു പങ്ക് യാത്രയ്ക്കായി മാറ്റിവെക്കേണ്ടി വരുന്നുണ്ട്. ഈ പദ്ധതിയിലൂടെ ഉണ്ടാകുന്ന സാമ്പത്തിക ലാഭം ആ കുടുംബങ്ങളുടെ ജീവിതനിലവാരം ഉയർത്തും. കൂടാതെ, ട്രാൻസ്ജെൻഡർ വ്യക്തികളെ പൊതുധാരയിലേക്ക് കൊണ്ടുവരാനും, പൊതുഗതാഗത സംവിധാനങ്ങളിൽ സ്ത്രീകൾക്ക് കൂടുതൽ സുരക്ഷിതത്വവും പങ്കാളിത്തവും ഉറപ്പാക്കാനും ഇത് സഹായിക്കും. ഡൽഹി, കർണാടക തുടങ്ങിയ സംസ്ഥാനങ്ങളിൽ ഇത് വൻ വിജയമാണെന്ന് തെളിഞ്ഞതുമാണ്.
കേരളത്തിലെ നിരവധി സ്ത്രീകൾ ദിവസേന ജോലി, വിദ്യാഭ്യാസം, ചികിത്സ, കുടുംബകാര്യങ്ങൾ എന്നിവയ്ക്കായി പൊതുഗതാഗതത്തെ ആശ്രയിക്കുന്നവരാണ്. പല കുടുംബങ്ങൾക്കും യാത്രാചെലവ് ഒരു സാമ്പത്തിക ബാധ്യതയാണ്. KSRTC ഓർഡിനറി ബസുകളിൽ സൗജന്യ യാത്ര അനുവദിക്കുന്നത് സ്ത്രീകളുടെ സാമ്പത്തിക ഭാരം കുറയ്ക്കുകയും അവരുടെ സഞ്ചാരസ്വാതന്ത്ര്യം വർധിപ്പിക്കുകയും ചെയ്യും.
പ്രത്യേകിച്ച് താഴ്ന്ന വരുമാനമുള്ള കുടുംബങ്ങളിലെ സ്ത്രീകൾക്ക് ഈ പദ്ധതി വലിയ സഹായമാകും. ദിവസേന യാത്രയ്ക്കായി ചെലവാകുന്ന തുക ലാഭിക്കാൻ കഴിയുന്നതിലൂടെ ആ പണം കുട്ടികളുടെ വിദ്യാഭ്യാസത്തിനോ കുടുംബത്തിന്റെ മറ്റ് ആവശ്യങ്ങൾക്കോ വിനിയോഗിക്കാനാകും. കൂടാതെ കൂടുതൽ സ്ത്രീകൾ തൊഴിൽ മേഖലയിലേക്കും വിദ്യാഭ്യാസ സ്ഥാപനങ്ങളിലേക്കും എത്താൻ ഇത് പ്രോത്സാഹനമാകും.
പൊതുഗതാഗത ഉപയോഗം വർധിക്കുന്നതിലൂടെ സ്വകാര്യ വാഹനങ്ങളുടെ ഉപയോഗം കുറയാനും ഗതാഗതക്കുരുക്കും മലിനീകരണവും കുറയാനും സാധ്യതയുണ്ട്. സമൂഹത്തിൽ സ്ത്രീകളുടെ പങ്കാളിത്തവും സ്വാതന്ത്ര്യവും ശക്തിപ്പെടുത്തുന്ന ഒരു നടപടിയായും ഈ പദ്ധതിയെ കാണാം.
എന്നിരുന്നാലും, പദ്ധതി ദീർഘകാലം വിജയകരമാക്കാൻ KSRTCയ്ക്ക് സർക്കാരിന്റെ സാമ്പത്തിക പിന്തുണ ഉറപ്പാക്കുകയും കൂടുതൽ ബസുകൾ, മികച്ച സർവീസുകൾ, യാത്രക്കാരുടെ സൗകര്യങ്ങൾ എന്നിവ മെച്ചപ്പെടുത്തുകയും വേണം.
സ്ത്രീകളുടെ സാമ്പത്തിക ശാക്തീകരണത്തിനും സാമൂഹിക മുന്നേറ്റത്തിനും സഹായകമാകുന്ന ഒരു ജനക്ഷേമ പദ്ധതിയായതിനാൽ ഞാൻ ഈ തീരുമാനത്തെ പിന്തുണക്കുന്നു. 👍🏻
Sorry, there were no items that matched your criteria.